الأحد، 18 سبتمبر 2011

                                  I ...... I need this look , truly.
I  need to be loved in my way sometimes
accept me plzzzzzzzzzz
plz b2ah
not every thing in your way
whstieny is good start



الثلاثاء، 19 يناير 2010

شتا


مش عارفه ليه النهاردة شتا اوي كدا...
الدنيا بتشتي "تقريبا اهل اسكندريه هما اللي بقولوها كده"
بس ان مقصدتش انها بتمطر ... الشتا بيدور بالدنيا بس مش تمطر ...
عايزه امشي في شارع من شوارع وسط البلد ..لا لا الدقي احسن .. بتفكرني لما كنت صغيرة ...
بس مش هاقدر ... هخاف علي حموزة .. ما انا بقي عندي حمزة عنده يدوب شهرين...
دافي جوه بطانيته .. في نوم عمييييييق ... السقعه بتنيمه اكتر ..
السقعه فاكرتني بالبلوج بناعي ....... بقالي كتير اوي ..... اول مره كانت ف الشتا ودايما بفتكره ف الشتيا
امبارح لقيتني بسمع نجاة .. اغنية الشتا
"بس وحياة اللي فات .. واللي اصبح ذكريات عمري ما حبيت ولا اتمنيت غيريك انت .. غيرك انت ياحبيبي"
بتدخل القلب من غير تخبيط
حلم ... بحلم كتييير اوي ... ومش عارفه ليه سقف الواقع بتاعي كده ضيق اوي .. محدش بيوسعه..
ودايما مش بقدر .. مش بقدر اكتب .. مش بقدر ارسم .. مش بقدر اخرج.. مش بقدر اتعلم .. مش بقدر مش بقدر اشتغل .. مش
مش كله مش كده هههه
لا فيه حاجات حلوة اوي اوي .. بس انا طماعة .. كل ماخد لازم اخد اكتر....

نرجع للشتا..
بفتكرني اوي اوي ف الشتا .. بقتكر كل الحاجات اللي عملتني ومعرفش ليه بتقع مني .. محدش بيوقعها مني .. معرفش هو انا اللي بزهق .. ولا هي حاجات كده بس علشان احس كل شوية اني مختلفة ..سوءال مقدرش اجاوب عليه.. او في الحقيقة مش عايزة...
افتكرت اذاعة البرنامج الاوربي اسامة واشرف ود سحر والواد احمد ابو الوفا
كنت كويسه اوي اوي ف الانجليزي لما كنت باسمعها .. دلوقتي بقيت بطيخة ..... بالذات ف الكتابة ... بطيخة بطيخة
كنت بحب اركب المواصلات اوي ف الشتا .. عرفت جميع المواصلات من الجيزة لمدينة نصر ... بس اجمل طريق بتاع السيدة عيشة
واحلي مواصلاة ااتوبيس 912 ... بس لما يكون في مكان تقعد طبعا.....
كانت بتبقي احلي فسخة ..
بحس بفرحتي وانا ماشيه ف الطريق ده.....
وببقي نفسي انزل واخد الطريق مشي ..
وياه لو الدنيا زحمة ودخلنا من اختصارات جوه السيدة عائشة ... ببقي مزاططة واخر مزاج....

الجو مغيم اوي و حموزة لسه نايم....... احمد في الشغل .. احمد بقي ساعات بيبقي بارد زي الشتا ...
الحقيقة هو بيحاول يظهر انه بارد حتي لو هو مش كده ..
يعني هو مينفعش يفضل يطاوعني كده كتيير .. ممكن اخد ع كده ... راجل بقه..
ومش كل الرجاله كده...
انا بحبه كده . بس ساعات بزهق اوي ...... وساعاتها ممكن اقوول كلام يضايق
بيفكر فينا كتير اوي ..... بس نفسي يفكر ف عقلي شوية ... بحس انه مش قادر يستوعبب عقلي .... او شايف اني بفكر ف حاجات ملهاش لازمه
دايما بدعي اننا نفضل كويسين مع بعض

يااااااااارب

الأربعاء، 20 فبراير 2008




BETTRY LOW



هيفصل شحن....


بقاله تلات ايام متشحنش ...


وبقالي تلات ايام ببص عليه ...
.يمكن ..


اشوف اسمك عليه...
وحشتني

الخميس، 30 نوفمبر 2006

احساس غريب بالوحده......لما تحس انك عايز اول حد تقابله تعرفه او متعرفوش تخده في حضنك وتعيط ... مش عارفة اتنفس من الخنقه..حتي النفس اللي داخل بيجرح

الاثنين، 27 نوفمبر 2006

قلب مفتوح

دائما تتخطي حدود الخيال بافكار تغدو... وتروح

بين ذكريات لم ولن تحدث

لتصبح ذكريات وهمية

تبكي وتضحك...يبتسم قلبها ابتسامة واهية.... تشعر بالالم وتدرك حقيقتها


عقل مفتوح عايش بقلب مفتوح



الأحد، 26 نوفمبر 2006

دفاتري القديمة




بقلب في اوراقي القديمة لقيت سطور كنت كتبها زماااااان ....


قعدت اضحك اوي عليا .. من الاسلوب والكلمات الماساوية والحركات بتاعت اول حب دي ..هي اقرب للخواطرمن انها تكون اي حاجة تانية.. جرت لمخيلتي ذكريات كتيرة بس اللي افتكرته اوي ساعاتها ان انجرحت اوي من حبيبي الاولاني ..وعرفت كمان حاجة عن نفسي اني مابنساش جرحي وبيرجع تاني يجرحني حتي لو عدي كام سنة...


اقروها واضحكوا معايا عليا...........و

حيران أنا طائر حزين
اطير وارجع للحنين
تراني تجدني كالأسد في العرين
ولكني عصفور في العش مسكين
بدا في الأفق حبيبب
وقلب حبيبي عن قلبي بعيد
ولكن قلبي من قلبه قريب
اخاف يوما ان ياتي المغيب
ويصبح قلبي في الكون وحيد
اعيش في الدنيا وحيد
أصبح في الحب عبيد


ويبعد عني طيف الحبيب
أنادي ولكن مافي مجيب
أحيا في وطني الجميل طريد
وأقول للدنيا لك العمر المديد
وان كان قلبي مليئا بالجروح
فقد ابقي لي بعد الطموح

وان كان عمري كتاب حزين
فلقد عزمت ان اصبح عنيد
وافتح لقلبي كتاب جديد
واعيش في دنيا جديده سعيد


بجد فطست علي نفسي من الضحك وانا بكتبها... معنديش اي مانع للتريقة.... يلا سلام عليكوا
رضوي




حسبنا الله ونعم الوكيل

يوم عادي زي بقيت الايام... صاحيه الصبح اروح الكلية ...وانا شرقاوية وكليتي ف الجيزه فطبعا مشوار الطريق الزراعي ...
ركبت الميكروباص وفي نص الطريق ... لقينا زحمة كتيرة والعربيات مش بتتحرك والطريق بيتحرك كل عشر دقائق... متر ..
طبعا عايزين نعرف فيه ايه ...حادثه والجثة لسه ميرميه ع الارض ...واحده واحده وصلنا مكان الحادثه
ست في منتصف العمر زي امي وامك ...خارجه تروح شغلها بتعدي الطريق عربيه هايجه خبطتها ..ركنوها علي جنب الطريق ...ساعتين الحادثه من الساعة 6 والساعة 8 كانت لسه مرمية علي الارض مغطينها بالجرايد وكل شوية الجرايد تطير
كل ده علشان طبعا بتوع الاسعاف والشرطة مابيصحو ش بدري كده هيقلقوا من نومهم علشان معرفش مين ..جري لها ايه!!!!
الجثة مرمية ع الارض والعربيات رايحةجايه واهل البلد كلهم واقفين جنب الجثه لحد محد يجي يثبت الحادثة
احنا بقينا ولا العراق وفلسطين
ربنا يرحمها ويرحمنا احنا كمان........و